Schwyzerdütsch

Ok, for all my non-Swiss-German-speaking friends sorry about this, but I got some complaints from my home country as not everyone speaks English there.

Hallo mini Liebe

Für alli vo euch wo leider nit hän chönne mitvefolge was bis jetzt alles so passiert isch do in Dublin es Chlises update.

Ich ha mich do am Afang, also vor über 6 Wuche, guet igläbt. Ich wohn ime Stadteil Rialto, dä isch an und für sich nit eso speziell und au nit grad bsunders schön, aber es isch noch bim Zentrum und ich had Luas, sone Art Tram, ganz noch bi mir. Ich wohn binere ganz liebe Familie, wobi eigentlich isches nur es Mami und e Tochter. S Huus isch us de 30er Johr, chli alt, abr sehr viel Charme und ich ha mi gli deheime gfühlt.

Bald nach däm ich acho bi hän mir am Trinity College, dört studier ich für das Semester, e sone Art Ifierigswuche gha. Es het relativ vieli Infoverastaltige geh, ich ha anderi Lüt kenneglernt und bi viel ufem Campus umegloffe. S Trinity College isch z'mitzt im Zentrum und het en riese grosse Campus. Weme dur dr "FronArch" also de Igangboge ine chunnt isches grad viel ruhiger und alles isch griener und schöner :-). Me het also so öbbe 7 minute vom einte ändi ans andere.

Jo und de e Wuche spöter het d Uni so wirklich agfange. Ich mach 4 verschiedeni Kürs, 2 in Informatik und 2 in Business. Ir erste Wuche isch alles neu gsi... am Trinity funktioniert halt alles nomol echli anders als ar ETH, abr ich ha relativ schnäll usegfunde wies lauft. Die erste Ire kenneglernt und scho die erste Kürs abgwählt (ha am Afang 6 gha).

Ir nexte Wuche bi ich im 7te Himmel gsi wägeme gwüsse Ir... Alles echli vrruckt, nach so kurzer Zyt en Fründ in Irland... Aber es isch super gsi, er isch super gsi und ich ha Irland ufsmol no besser gfunde. Na, 4 Wuche spöter isch das denn so zimli alles vrbi gsi... Zu unterschiedlich, beidi dickköpfig,... und ez sin mir gueti Kollege. Abr die 4 Wuche sin wirklich super gsi, ich ha viel erläbt, viel gseh und Wolke 7 isch doch glich toll.

Die Wuche isch chli schwieriger gsi. Ich bi sit am Mäntig zimli vrkeltet... wobi e Vrkeltig isch glaub chli untertriebe... Isch evtl au e Grippe gsi kei Ahnig. Bi uf jede Fall deheim bliebe, fuul umeghange, nit viel gmacht... Na, bim Wätter dusse isch das au nit iladend gsi.. Miserabels Wätter sit am Mäntig, Irland macht sich alli Ehr. Und d Arbet fürd Uni isch sich am uftüürme... Na, es het au paar tolli Sache geh die Wuche :-). Am Fritig Obe bini ins Kino mit mire "Gastfamilie" und de Film isch super gsi "The kids are alright" und gester Obe bini zunere andere Ustuschstudäntin Heim... mir sin vieli gsi, hän z'Nachtgässe und Kartespiel gmacht und es isch super gsi!

Suscht hani scho einigi Sache in Dublin gseh, abr es git no viel woni noni gseh ha... De hani scho 2 Usflüg gmacht, eine nach Glendalough und Kilkenny und der ander nach Killarney und ind Region Kerry. Isch beides super gsi... Ich plan spötistens de next Usflug wenn de Johann und Jan afangs dezember uf Bsuech chöme.

So und ez muessi mol los :-).

glg Sara